Sa normativa po s’amparu de is minorias linguìsticas
Presentaus innoi sa normativa internatzionali, statali e regionali prus de importu po s’amparu de is minorias linguìsticas.
Su 5 de onniasantu de su 1992, in Strasburgu, ant aprovau sa “Carta europea de is limbas regionales o minoritàrias”, unu tratau abertu a sa firma de is Stadus membrus e a s’adesioni de is Stados non membrus. Sa Carta previdit s’amparu e su promovimentu de is lìnguas stòricas regionalis e de minoria. Su documentu nascit, a un’ala, po favoressi s’allogamentu e su svilupu de su connotu e de su patrimòniu culturali europeu, a s’àtera, po amparai su respetu de su diritu chi balit sèmpiri e chi est arreconnotu in totu su mundu de impreai una lingua regionali o de una minoria linguìstica in sa vida privada e pùblica. S’Itàlia at firmau sa “Carta” su 27 de làmpadas de su 2000, ma oi in dii su Parlamentu italianu no dd’at ratificada ancoras e, duncas, in su Paisu nostu no est intrada in vigèntzia.
In Itàlia, s’amparu de is minorias linguìsticas est prevìdiu de s’art. 6 de sa Costitutzioni, chi narat chi “Sa Repùblica amparat cun normas aposta is minorias linguìsticas”. Is “normas aposta” sunt essidas cun sa Lei 15 de nadali de su 1999, n. 482 (“Normas in contu de s’amparu de is minorias linguìsticas stòricas”), sighida de su DPCM 2 de maju de su 2001, n. 345 (“Regulamentu de aplicu de sa lei 15 de nadali de su 1999, n. 482, chi presentat normas in contu de s’amparu de is minorias linguìsticas stòricas”).
In Sardìnnia, infinis, teneus sa Lei regionali 3 de argiolas de su 2018, n. 22, intitulada “Disciplina de sa polìtica linguìstica regionali”. Cunforma a s’art. 5 de sa Lei regionali 22/2018, sa Giunta regionali aprovat unu Pranu de polìtica linguìstica.
(A.I.G.)
Alliongiada s’agatat totu sa normativa arremonada:
- Costitutzioni de sa Repùblica Italiana
- Carta europea de is lìnguas regionalis o minoritàrias de su 5 de onniasantu de su 1992
- Lei 15 de nadali de su 1999, n. 482
- D.P.R. 2 de maju de su 2001, n. 345
- Lei regionali 3 de argiolas de su 2018, n. 22
- Pranu de polìtica linguìstica regionali