Mòguru – BìFoto Fest Domìnigu 9 de donniasantu 2025: una dii paris a su fotografu Søren Solkær
Domìnigu 9 de donniasantu 2025 at a essi una dii speciali po su BìFoto Fest, sa bidda de Mòguru at a acasagiai a Søren Solkær unu fotografu de fama internatzionali connotu in totu su mundu po is fotografias suas de artistas famados comenti a Björk, Paul McCartney e Amy Winehouse.
A ora de is tres e mesu de merii sa bisita acumpangiada peri sa bidda po biri sa mustra chi at a movi de sa sea de s’AVIS de Mòguru, in Pratza de Giovanni XXIII.
A is cincu e mesu un’arrexonada cun s’autori, me in is localis de sa Fiera de s’artesanadu artìsticu de sa Sardìnnia, innui s’artista at a contai sa carriera sua: 30 annus de traballu a cuntatu cun sa mùsica, su cìnema e s’arti chi dd’ant fatu arribai a furriai in immàginis ùnicas e rapresentativas unus cantu protagonistas de livellu internatzionali.
Po totu is informus e po ndi sciri de prus fait a intrai a su giassu: www.bifotofest.it
......................................................
MÒGURU – Su 9 de donniasantu 2025: unu Domìnigu de cultura e spàssiu po mannue e pipius in Cuccurada
Domìnigu 9 de donniasantu 2025 at a essi una dii spassiosa po mannus e pipius, in su Nuraghe Cuccurada ant cuncordau a is tres de merii su laboratòriu poi s pipius "Is Shardaneddus riciclonis”, a incuru de Maestrodascia, e a is cincu sa bisita acumpangiada a su Nuraghi.
Po is mannus invècias est in programma a is tres de merii sa bisita acumpangiada e a s’acabbu unu aperitivu
Po pigai parti a sa faina tocat a si prenotai innantis scriendi a s’indiritzu e-mail mariposas.cuccurada@gmail.com o mandendi unu messàgiu in whatsapp a su nùmeru 352.0418261
......................................................
MÒGURU - Cenàbara 31 de su mesi de ladàmini 2025 bisita acumpangiada a Cuccurada cun s’archeòloga Sara Carta
Aintru de is fainas de “cenàbara de cultura” chi promovit sa Cooperativa Mariposas de Sardinia cun s’agiudu de s’Amministratzioni comunali de Mòguru, su 31 de su mesi de ladàmini 2025 a is 17.30 est in programma una bisita acumpangiada a su giassu archeològicu de Cuccurada cun sa spiegatzioni de s’archeòloga Sara Carta.
Unu biàgiu in sa stòria po connosci is particularidadis architetònicas de su nuraghi Cuccurada unu de is prus de importu de sa Sardìnnia tzentru-meridionali.
Un’ocasioni po acostai sa genti a sa stòria locali, po connosci mellus su giassu de Cuccurada, sìmbulu de identidadi e risursa manna po su territòriu, e fintzas una ocasioni po arresonai de comenti avalorai e fai connosci custu giassu castiendi faci a su benidori.
Po informus in contu de sa bisita acumpangiada fait a tzerriai a su nùmeru 3520418261.
......................................................
MASUDDAS- Domìnigu 26 de su mesi de ladàmini su cunvènniu “I Vulcani della Marmilla-Parte Montis” una stòria longa 20 millionis de annus”.
Su Comunu de Masuddas a manu de pari cun s’Òrdini de is Geòlogus de Sardìnnia , s’Universidadi de Tàtari e Casteddu e sa Fondatzione Parte Montis at cuncordau su cunvènniu ““I Vulcani della Marmilla-Parte Montis” una stòria longa 20 millionis de annus”. Domìnigu 26 de su mesi de ladàmini 2025 a is dexi de mangianu, in s’aposentu de su Consillu in Masuddas. Custa faina nascit po presentai su progetu de avaloramentu de “Su Caròngiu de Fanari” po ddu fai a connosci e ddi giai amparu. A prus de ponni manu a is camineras po ddui lompi e a is cartellus de informus is tecnologias modernas ant a permiti de fai una bisita virtuali de custu giassu de atesu a totu is chi no nci podint arribai.
“Custu progetu est unu passu annantis in su caminu de avaloramentu de su patrimòniu naturalìsticu nostu. Su Caròngiu de Fanari no est sceti unu monumentu geològicu de interessu mondiali ma unu sìmbulu de identidadi e de sa stòria vulcànica nosta. Custu progetu est aintru de unu progetu prus mannu chi punnat a avalorai su territòriu acapiendi a pari ambienti, promotzioni turìstica e connoscèntzia scientìfica.” Aici at nadu su Sìndigu de Masuddas Ennio Vacca.
A merii sa bisita acumpangiada a su situ.
......................................................
SÌMABA – Domìnigu 26 de su mesi de ladàmini 2025 torrat sa manifestatzioni “Portalis Abertus”
In Sìmaba domìnigu 26 de su mesi de ladàmini 2025 torrat sa manifestatzioni “Portalis Abertus”.
Unu programma bellu e prenu prenu de fainas: mustras fotogràficas e artìsticas, espositzionis musealis e artesanalis, spetàculus musicalis, produtus tìpicus de tastai e de comporai e bisitas acumpangiadas a is cortis po totu sa dii intrea.
Po is pipieddus unu giassu po giogai e unu menù pensau aposta po issus.
Dònnia portali tenit una stòria de contai: sa stòria nosta! Benei a Sìmaba a dd'ascurtai!
Su programma cumpletu in sa pàgina FB https://www.facebook.com/events/1275995047659603/?acontext=%7B%22event_action_history%22%3A[]%7D
......................................................
MÒGURU – Sàbadu 25 e domìnigu 26 de su mesi de ladàmini arribant a Mòguru is Diis de su Romànicu 2025
Sàbadu 25 e domìnigu 26 de su mesi de ladàmini faint tapa in Mòguru is Diis de su Romànicu 2025!
Duas diis dedicadas a scoberri e avalorai totu su patrimòniu stòricu romànicu de sa Crèsia de su Crammu de su de XIV sèculus. Sa Crèsia at a aberri in custus oràrius:
- a mangianu de is 10.00 a is 13.00
- a merii de is 16.00 a is 18.00
Custa faina dda promovit sa Fondatzioni Sardegna Isola del Romanico cun s’agiudu de su Comunu de Mòguru.
Su programma cumpretu fait a ddu ligi in su giassu www.fondazioneromanicosardegna.it
......................................................
POMPU- Domìnigu 19 de su mesi de ladàmini 2025 sa de V editzionis de Fromentu Bread Experience
Su Comunu de Pompu a manus de pari cun sa Pro Loco, cun s’agiudu de s’Unioni de is Comunus Parte Montis, de sa Fondatzioni Parte Montis e de sa Regioni Autònoma de Sardìnnia at cuncordau sa de V editzionis de Fromentu Bread Experience una dii dedicada totu a su pani e a is traditzionis acapiadas a issu e prena prena de fainas po fai connosci su territòriu e is saboris antigus. Fromentu Bread Experience promovit unu turismu lentu e acapiau a esperièntzias pràticas.
Su meri mannu de sa manifestatzioni est su pani, antzis s’arti de fai su pani! Un’arti antiga meda chi est ancora bia in totu is biddas e biddixeddas de Sardìnnia. Su pani in Sardìnnia est comenti sa lìngua, dònnia bidda tenit sa traditzioni sua.
Domìnigu 19 in Pompu, de mangianu chitzi, is caminus s’ant a animai de genti e su fragu bellu de su pani apena bogau de su forru s’at a spraxi peri is caminus. Totu sa dii manna s’at a podi girai me in sa bidda peri is bancarellas de artesanus, butegas medievalis, fai bisitas acumpangiadas a su nuraghe Santu Miali e a su museu multimediali “Casa del pane”.
No ant a mancai is laboratòrius po mannus e pipieddus, de sa pintadura de su cocoi a is laboratòrius po imparai a fai macarronis e pastas tìpicas, laboratòrius de ceràmica, giogus traditzionalis e su laboratòriu “Sa cascita de is arrefudus” po imparai a is piciocheddus a fai gioghitus in manera ecosostenìbili.
A merii laboratòrius po fai pani, pitza e durcis lievitaus. E no at a mancai sa mùsica e una espositzioni de istrumentus musicalis traditzionalis e fatu fatu at a fai a si firmai a tastai mandiaris tìpicus de sa traditzioni sarda.
A pustis de ai tastau su pani callenti apena essiu de su forru, respirau is traditzionis, sa stòria e sa cultura de custa biddixedda de Marmidda sa dii at a cabbai cun su spetàculu de sa Cumpangia A ballare.
Po ligi totu su programma e totu is informus in contu de sa manifestatzioni fait a intrai a su giassu
......................................................
POMPU – “Fromentu” est a canta de torrai! Senniai.sì sa dii!!!
In Pompu est agiumai totu prontu…Su Comunu e sa Pro Loco funt cumintzendi a contai is diis a s’imbessi ca est a canta de torrai Fromentu sa manifestatzioni dedicada totu a su pani chi est in programma domìnigu 19 de su mesi de ladàmini 2025
Is artesanus, hobbistas e chini totu bollit pigai parti a sa manifestatzioni cun is produtus cosa sua depit fai domanda a su Comunu a intru de su 12 de su mesi de ladàmini de su 2025.
......................................................
MASUDDAS- “Cristalli scienza e magia”, in su Geo Museu Monte Arci Sàbadu 11 de su mesi de ladàmini
In ocasioni de sa de XIII editzionis de “Sa cida de su pianeta Terra”, Sàbadu 11 de su mesi de ladàmini 2025, a is ses de merii, su Geo Museu Monte Arci de Masuddas at cuncordau s’atòbiu “Cristalli scienza e magia”, unu biàgiu intra de sa scièntzia e is mistèrius millenàrius de is cristallus.
Su geòlogu Luigi Sanciu paris cun sa geòloga e gemmòloga Eleonora Spiga ant a contai comenti si formant is cristallus e is segretus cuaus chi de semper atirant sa curiosidadi de s’òmini. Geologia, stòria, paristòrias, scièntzia e spiritualidadi.
Po pigai parti a s’atòbiu est òbligu a s’allistai a intru de su 10 de su mesi de ladàmini.
Po informus e iscritzionis: Luigi Sanciu – 377 3436647; info@fondazionepartemontis.it
......................................................
MÒGURU – Sàbadu 11 de su mesi de ladàmini mùsica e bisita acumpangiada a su Nuraghe Cuccurada
Un’esperièntzia ùnica intra de mùsica e archeologia: in su Nuraghe Cuccurada de Mòguru su 11 de su mesi de ladàmini sa bisita acumpangiada a su situ archeològicu s’at a fai “in mùsica” cun su sonu de is launeddas de s’Orchestra Populare Sarda.
Nàscia in su 2007 s’Orchestra contat unus 40 elementus e rapresentat a dii de oi una de is realtadis prus de importu in s’amparu e avaloramentu de is traditzionis musicalis sardas. Totus sonanti s launeddas e meda de issus sonant prus de unu istrumentu. Su repertòriu issoru andat de su ballu, a is sonadas religiosas e a cussas chi acumpàngiant su cantu.
In Mòguru Orlando Mascia, Matteo Muscas e Luca Schirru ant a acumpangiai a is bisitadoris cun sa mùsica de is launeddas: melodias antigas e pedras millenàrias
Po si prenotai est mellus a mandai una e-mail a prenotazionipedras@gmail.com;
Custa faina fai parti de su “Pedras et Sonus – Tenore”, de su 10 a 12 de su mesi de ladàmini 2025.
Su programma cumpletu s’agatat in www.pedrasetsonus.it
......................................................
MASUDDAS –CEAS abertus e bisita a sa crèsiedda de Santu Lenardu domìnigu 5 de su mesi de ladàmini 2025
Is Centrus de educatzioni ambientali e a sa sustenibilidadi de sa provìntzia de Aristanis aderint a “Ceas abertus 2025”. Su tema de ocannu est “Is custodis de s’àcua”.
Po custa ocasioni su Ceas de Masuddas a manus de pari cun su GeoMuseu MonteArci Stefano Incani at cuncordau un’atòbiu a tema, “Il valore dell’acqua”, e giat apuntamentu a totus a domìnigu 5 de su mesi de ladàmini me in is localis de su Cunventu bèciu de is Paras Capucinus in Masuddas.
A prus de is bisitas acumpangiadas a su Geo Museu, a su Giardinu botànicu e a su Cunventu funt in programma laboratòrius didàticus po is pipieddus, a is dexi e mesu, e unu aperitivu scientìficu a is cincu de merii paris cun su geòlogu Luigi Sanciu. Po nci pigai parti parti tocat a s’allistai innantis. A is seti de merii sa proietzioni de su film-documentàriu “Il sale della terra”.
Po informus e prenotatzionis: 389 1777100 – E-mail: ceasmasullas@tiscali.it
Sa pròpiu dii, in ocasioni de Is Diis de su Romànicu in Sardìnnia, at a fai a abisitai finsas sa crèsia de Santu Lenardu, sa prus antiga de Masuddas de is 09.00 a is 13.00 e de is 15.00 a is 19.00.
Programma e informus in https://www.fondazioneromanicosardegna.it/
......................................................
MÒGURU – Sàbadu 4 e domìnigu 5 de su mesi de ladàmini sa de XV editzionis de su BìFoto Fest – Festival Internatzionali de sa Fotografia in Sardìnnia 2025 e premiatzioni de su cuncursu Mar Milla
Su 4 e su 5 de su mesi de ladàmini Mòguru at a acasagiai sa de XV editzionis de su BìFoto Fest – Festival Internatzionali de sa Fotografia in Sardìnnia. Su festival dd’ant cuncordau is diretoris artìsticus Vittorio Cannas e Stefano Pia, gràtzias a sa Fondazione di Sardegna e de su Comunu de Mòguru.
In su coru stòricu de sa bidda ant a essi sistemadas unas 400 òperas e s’at a podi andai a ddas biri, gratis, a totu is oras. A prus de is òperas nci ant a essi atòbius a tema e cunvènnius cun professionistas e apassionaus de su setori.
Su tema de s’editzioni de ocannu est Bitter Tears di Johnny Cash e contat sa suferèntzia e s’aguantu de is nativus americanus. Unu tema chi su festival at scioberau po meledai in contu de s’identidadi de sa Sardìnnia e de is cambiamentus de sa sotziedadi de oi. Su protagonista de custa editzioni est Dario Coletti, fotografu romanu ativu meda in is annus ‘80.
In custa ocasioni s’at a fai finsas sa premiatzioni de su cuncursu fotogràficu Mar Milla destinau a is piciocheddus chi bivint me in is Comunus de s’Unioni Parte Montis. Is òperas premiadas contant cun is ogus de is giòvanus comenti si bivi s’istadi in is giassus chi non funt a canta a mari.
Totu is informus in su giassu https://www.bifotofest.it/
......................................................
MÒGURU – Fiera de s’artesanadu artìsticu de Sardìnnia: serrat dòminigu 14 de cabudanni.
Inaugurada in su mesi-de-argiolas e acasagiada in su Centro Fiera del tappeto, me in Mòguru, in Pratza de is Màrtiris de sa Libertadi, serrat su 14 de cabudanni 2025 sa Fiera de s’artesanadu artìsticu de Sardìnnia.
In s’ùrtimu cida, totu is tzitadinus moguresus e totu cussus residentis in s’ Unioni Parte Montis ant a podi intrai a sa Fiera gratis sena de pagai billetu.
Arregordaus ca sa Fiera est aberta dònnia dii de is 10 de mangianu a is 9 de merii.
Po totu is informus fai a intrai a su giassu www.fierartigianatosardegna.it
......................................................
POMPU- Festa de Santa Maria su 6, su 7 e su 8 de cabudanni 2025
Su comitau de Santa Maria 2025 a manus de pari cun sa Pro loco de Pompu, cun s’agiudu de s’Amministratzioni comunali e de totu is tzitadinus ant cuncordau de su 6 a su 8 de cabudanni sa festa religiosa e tzivili in onore de Santa Maria.
Sàbadu 6 de cabudanni a mangianu de is 10.00 a is 13.00 at a fai a bisitai sa Domu de su pani puru e a scoberri is traditzionis antigas de sa biddixedda.
Totu su programma cumpletu de sa festa in sa pàgina FB de su Comitau de ocannu https://www.facebook.com/ComitatoSantaMariaPompu
......................................................
MÒGURU – Sa de 3 editzionis de Artis, sonus e saboris su 6 de cabudanni 2025
Su Comunu de Mòguru invitat a totus a pigai parti, su 6 de cabudanni, a sa de tres editzionis de Artis, sonus e saboris, unu biàgiu aintru de sa stòria, s’arti, is traditzioni, sa mùsica, s’artesanau e is mandiaris tìpicus.
Custu biàgiu cumintzat in su giassu archeològicu de Cuccurada, sighit in sa Fiera e acabbat in bia Nuova, in su coru de sa bidda de Parte Montis cun mandiaris, artesanau e mùsica de sa traditzioni sarda.
Fait a ligi su programma cumpletu e totu is informus in su giassu https://www.fierartigianatosardegna.it/arte-suoni-sapori.../ e in sa Pàgina FB istitutzionali de su Comunu de Mòguru https://www.facebook.com/comunemogoro/?locale=it_IT
......................................................
SIRIS - Festa de Santu Pissenti su 1 de cabudanni
Unu bellu comitau de giòvanus at cuncordau ocannu sa festa religiosa e tzivili de Santu Pissenti (Vincenzo).
Sa festa religiosa cumintzat domìnigu 30 de austu cun sa prufessoni chi nci portat su Santu de crèsia manna a sa cresiedda a issu intitulada e at a sighiri finsas a su 7 de cabudanni cun prufessoni, missa e ritus acapiaus a sa traditzioni. Sa primu dii de donniassantu a is noi oras e mesu s’Inserru.
Su programma religiosu e tzivili de sa festa in https://www.facebook.com/SaGloriosa/posts/carissimi-ecco-il-programma-della-festa-di-san-vincenzo-a-siris/1087220376922259/
......................................................
MASUDDAS – “DistillARCI” su 30 de austu in su giardinu botànicu
In Masuddas, me in su Giardinu botànicu de su Monti Arci, in mesu de su fragu bellu de is molas de is erbas nuscosas, su 30 de austu ant cuncordau “DistillARCI” un’atòbiu chi poni paris natura e traditzioni, un’ocasioni po fai a connosci su mellus de is distillerias sardas e de su territòriu chi ddas acasagiat.
......................................................
MÒGURU – Festa de Santa Maria Cracàxia de su 22 a su 25 de austu
S’assòtziu “Po Mòguru e Cracàxia” a manus de paris cun s’amministratzioni comunali, cuncordat sa festa religiosa e tzivili de Santa Maria Cracàxia e cun s’agiudu de is massajus mogoresus cuncordat po su 24 de austu sa de XX editzionis de sa sagra de su Porcu in tàcula e de is binus mogoresus e festa de sa fruta moguresa.
Su programma cumpletu e is inditus po lompi a Cracàxia in sa pàgina FB https://www.facebook.com/hashtag/festadicracaxia2025?locale=it_IT
......................................................
MASUDDAS – Cummèdia in lìngua sarda “Pan’ ‘e presta” su 20 de austu
Mèrcuris 20 de austu 2025 a is dexi de meri in Pratza de Sepùlveda in Masuddas sa cumpangia “Filodrammatica Guspinese” presentat sa Cummèdia Pan’e presta de Tonio Dei.
......................................................
MÒGURU - Pedras e Sonus jazz festival 2025 de su 17 a su 21 de austu
De su 17 a su 21 de austu, sa bidda de Mòguru acasagiat su Pedras e Sonus jazz festival 2025. Unu biàgiu intra de mùsica jazz, dantza acrobàtica e ispetàculus in Pratza de sa crèsia de su Cramu e me in su giassu de su nuraxi Cuccurada cun artistas natzionalis e internatzionalis.
Po totu is informus e po fai is billetus fait a intrai a su giassu www.pedrasetsonus.it
......................................................
MASUDDAS - “Festa de s’emigrau” su 9 de austu
Sa Pro Loco de Masuddas, cun s’agiudu de s’Amministratzioni comunali, cuncordat po sàbadu 9 de austu sa Festa de s’emigrau.
S’atòbiu est in pratza de Sepùlve a cumintzai de is 8.30 de merii.
Po totu is informus fai a intrai a sa pàgina FB de sa Pro Loco de Masuddas https://www.facebook.com/p/Pro-Loco-Masullas-Official-100092450135442/?locale=it_IT
......................................................
SÌMABA - Su 9 de austu sa de VIII editzionis de “Simabesus in su mundu”
S’ Amministratzioni comunali de Sìmaba a manus de pari cun sa Pro Loco cuncordat po su 9 de austu sa de VIII editzionis de “Simabesus in su mundu”, un’atòbiu chi abetat totu sa bidda pensau po fai benni a pari is chi bivint in sa biddixedda cun is simabesus disterraus chi bivint foras de Sardìnnia totu s’annu e torrant a bidda issoru poi s fèrias de s’istiu.
Po totu is informus https://www.facebook.com/prolocosimala/
......................................................
MASUDDAS – Su Dromos Festival su 7 de austu in su giardinu botànicu cun Danilo Rea, Massimo Moriconi & Ellade Bandini
Su Dromos Festival arribat po sa primu borta a Masuddas!
Su 7 de austu 2025 su giardinu botànicu de Masuddas at a acasagiai su Reset Trio cun is tres musicistas prus mannus de su jazz italianu e internatzionali: Danilo Rea, Massimo Moriconi e Ellade Bandini. A s’acabbu dj set cun Gianluca Petrella, unu de is sonadoris de trumba prus originalis de Europa.
Po totu is informus e po connosci su programma cumpletu de su Festival fait a intrai a su giassu https://dromosfestival.it/
......................................................
GONNOSTRAMATZA- S'ùrtimu atòbiu de su Marmilla Folk Festival su 28 de su mesi-de-argiolas 2025
Sa de XIV editzionis de su Festival Internatzionali de su Folklori "Sa Corona Arrùbia" acabbat in Gonnostramatza e giait apuntamentu a totus a ocannu chi benit. In Pratza de Santu Micheli a is 10 de meri is protagonistas ant a essi su grupu folk Riinat Ja Rikut chi arribat de sa Finlàndia, su grupu folk G.B. Tuveri de Collinas e s’Assòtziu culturali e grupu folk de Sòrgono.
At a essi custa finsas una ocasioni po fai a connosci sa bidda, is traditzionis e is bellesas suas.
Su Marmilla Folk Festival est una rassìnnia internatzionali chi si movit de unu logu a s’àteru promòvia de su Cunsòrtziu turìsticu Sa Corona Arrùbia.
Po totu is informus fait a intrai a sa pàgina FB https://www.facebook.com/marmillafolkfestival/
......................................................
MÒGURU – Inauguratzioni de sa de 64 editzionis de sa Fiera de s’artesanadu artìsticu de Sardìnnia su 18 de su mesi-de-argiolas 2025
At a essi inaugurada su 18 de su mesi-de-argiolas 2025 in Mòguru a is seti de merii sa de 64 editzionis de sa Fiera de s’artesanadu artìsticu de Sardìnnia.
Sa Fiera, acasagiada in su Centro Fiera del tappeto in Mòguru, at a essi aberta de su 19 de su mesi-de argiolas a su 14 de su mesi de cabudanni 2025.
Po totu is informus fai a intrai a su giassu www.fierartigianatosardegna.it
......................................................
MASUDDAS - Su 26 de su mesi-de-argiolas 2025 sa de VII editzionis de sa Sagra de su porceddu arrustiu
S’assòtziu Fadeus Festa de Masuddas at cuncordau po sàbadu 26 de su mesi-de-argiolas 2025 sa de VII editzionis de sa Sagra de su porceddu arrustiu.
S’apuntamentu po totus est in Pratza Sepulveda de is otu de meri cun cosa bella de papai e is sonus de Dilliriana.
Informus e cuntatus in sa pàgina FB de s'assòtziu: https://www.facebook.com/p/FadeusFesta-100078021701178/
......................................................
MASUDDAS - Festa manna po Sa Gloriosa: su 29 de làmpadas , su 1, su 2 e su 3 de su mesi-de-argiolas 2025
Festa manna in Masuddas po Sa Gloriosa, patrona de sa bidda de Parte Montis. Su Comitau de Sa Gloriosa 2025 at traballau meda po cuncordai ocannu puru una festa bella.
Su programma cumpletu de sa festa s’agatat in: https://www.facebook.com/people/Comitato-Sa-Gloriosa-2025/100094042233647/.
......................................................
MASUDDAS, domìnigu 8 de làmpadas 2025 torrat “Appuntamento in giardino”
In ocasioni de sa manifestatzioni “Appuntamento in Giardino” promòvia de s’APGI (Assòtziu Parcus e Giardinus de Itàlia) at a fai a intrai a su Giardinu botànicu de su Monte Arci, a scoberri totu is genias mediterràneas chi nci funt e a castiai is òperas de s’artista Leander Lukas Loewe. Una dii intra de passiladas in mesu de sa natura, bisitas ghiadas, arti e geologia...
Po ndi sciri de prus intra a https://fb.me/e/9KMSpUr1
Po informus e prenotatzionis: prenotazioni@fondazionepartemontis.it , cell. 389.1777100
......................................................
“MONUMENTUS ABERTUS” IN PARTE MONTIS: Gonnostramatza, Mòguru e Sìmaba aberint is giannas po fai a connosci is bellesas insoru.
Funt medas is Comunus sardus chi pigant parti ocannu a sa de XXIX editzionis de sa manifestatzioni natzionali “Monumentus Abertus” promòvia de s’Assòtziu Imago Mundi a manus de pari cun is Amministratzionis localis e sempri cun s’agiudu mannu de is studiantis e de is volontàrius chi contant is bellesas, sa cultura e s’identidadi de is territòrius.
In mesu de is àterus Comunus sardus de sa Provìntzia de Aristanis, ocannu a sa manifestatzioni nci pigant parti tres biddas de s’Unioni de is Comunus Parte Montis: Gonnostramatza e, po sa primu borta, Mòguru e Sìmaba puru.
Is tres biddas aberint is giannas insoru a chini totu at a tenni praxeri de abisitai, gratis, is monumentus istòricus, is giassus archeològicus, is crèsias e is museus. Is acumpangiadoris chi ant a fai de ghia ant a essi studiantis o volontàrius localis chi ant a fai a connosci sa stòria prus pagu connota de su territòriu insoru.
Su biàgiu peri is biddas de Parte Montis cumintzat de Sìmaba…s’apuntamentu po totus est:
- in Sìmaba sàbadu 24 e domìnigu 25 de maju de su 2025, po ligi su programma cumpletu intra a https://monumentiaperti.com/it/edizioni/2025/comuni/simala/;
- in Mòguru sàbadu 31 de maju e domìnigu 1 de làmpadas 2025, po ligi su programma cumpletu intra a https://monumentiaperti.com/it/edizioni/2025/comuni/mogoro/;
- in Gonnostramatza domìnigu 1 de làmpadas 2025, po ligi su programma cumpletu intra a https://monumentiaperti.com/it/edizioni/2025/comuni/gonnostramatza/ .
....................................................................................
MASUDDAS, sagra de su caboniscu e de is crogoristas su 31 de maju de su 2025
In Masuddas “sa bidda de is cabonis e de is puddas” sa Pro Loco e is assòtzius localis, cun s’agiudu de su Comunu, cuncordant sàbadu 31 de maju de su 2025 sa de XIV editzionis de sa sagra de su caboniscu e sa de II editzionis de sa sagra de is crogoristas, sa pasta tìpica masuddesa fata a manus.
Si nci boleis passai una dii diferenti, in una bidda de spantu, e scoberri cultura, traditzionis, saboris e mestieris antigus in Masuddas s’ abetant! No ant a mancai is laboratòrius po imparai a fai crogoristas, scateddus, scannus e po imparai a tessi.
Su programma cumpletu de sa manifestatzioni in https://fb.me/e/8bocmBe9i