Su sportellu linguìsticu est unu servìtziu abertu gràtzias a su finantziamentu otentu de sa Regioni Autònoma de Sardigna – Assessorau de s’Istrutzioni pùblica, Benis culturalis, Informatzioni, Spetàculu e Sport – Servìtziu Lìngua e Cultura sarda. Is leis chi permitint su finantziamentu de custa faina funt duas: cussa statali (Lei 15 de idas de su 1999, n. 482 – Normas in matèria de amparu de is minorias linguìsticas stòricas) e cussa regionali (Lei regionali 3 de argiolas de su 2018, n. 22 – Disciplina de sa polìtica linguìstica regionali).

Su sportellu tenit sa punna de agiudai a is tzitadinus chi bolint impreai sa lìngua sarda, in su fueddai o in sa scridura, in is raportus cun s’Amministratzioni pùblica e est de agiudu a is Amministratzionis po parai fronti in sa mèllus manera a custu bisòngiu. Is operadoris de sportellu funt a disponimentu de is amministradoris e de su personali dipendenti de is entis, e - prus che totu - de is tzitadinus, de is studiantis, de is insegnantis, de is bibliotecas comunalis, de is assòtzius culturalis, isportivus, de recreu, e aici sighendi, po cali si siat informu, aprofundamentu, duda, curiosidadi chi pertocat sa lìngua sarda e s’impreu suu in is raportus cun s’Amministratzioni pùblica e in cali si siat logu, po consulèntzias bibliogràficas, sitogràficas, ortogràficas e grammaticalis in contu de su sardu, po consulèntzias in sa carrera didàtica e in sa carrera giurìdicu-normadora.

De su mesi de nadali de su 2024 funt incarreradas is fainas de su progetu nou “Parte Montis in lìngua sarda” finantziau de sa Regioni Autònoma de Sardìnnia cunforma a sa Lei 482/1999 e a sa Lei regionali 22/2018 a s’Unioni de is Comunus Parte Montis po s’Annualidadi 2024.

Su progetu previdit s’ativatzioni de su servìtziu de Sportellu Linguìsticu a disponimentu de totu is tzitadinus de is ses Comunus de s’Unioni (Gonnostramatza, Masuddas, Mòguru, Pompu, Sìmaba e Siris), unu cursu de formatzioni de 30 oras po dipendentis pùbricus e po totu is tzitadinus interessaus, e sa faina de animatzioni linguìstica “Aberi su Calàsciu”: un’ocasioni po ndi bogai a pillu e po pubricai òperas literàrias inèditas scritas in lìngua sarda, po ddis donai importu e fai a connosci su patrimòniu lessicali de su territòriu.

Su servìtziu est acasagiau in sa sea de s’Unioni de is Comunus, chi s’agatat in Mòguru in bia de Ugo Foscolo n. 1, e at a abarrai abertu fintzas a su 30 de donniassantu de su 2025. Ma is operadoris, si serbit e si presentat su bisòngiu, funt a disponimentu po si transiri a is biddas de s’Unioni. Su progetu previdit s’abertura po 6 oras a sa cida, in custas diis e cunforma a custus oràrius

- su mèrcuris a mangianu, de is otu a is duas.

In is diis e in is oràrius inditaus fait a circai su sportellu linguìsticu de personi, cun su telèfonu faendi is nùmerus 0783/997379 o 347/9382393 o mandendi un’e-mail a s’indiritzu unione.partemontis@unionecomunipartemontis.it.