Sa Provìntzia de Aristanis, a manus de pari cun sa sotziedadi cooperativa “L’altra cultura” e cun s’assòtziu “Arrepentina e Mutetus”, cuncordat sa primu editzioni de su Cuncursu de poesia in lìngua sarda “Tessende rimas” - 2025.

 Sa punna de su Cuncursu, cuncordau cun s’agiudu de sa Regioni Autònoma de Sardigna (Avisu Tu.Li.S. 2024) e de su Comunu de Aristanis, est cussa de “abbiatzare e avalorare unas cantas formas de espressada poètica de su connotu de su Cabu de Giosso de Sardigna, de su Barigadu, de su Mandrolisai e de su Guiltzier, bastante apretziadas e ispartas ancoras in is annos Setanta e Otanta de su Noighentos, ma chi a dies de oe sunt in suferèntzia e arriscant de isparèssere pro more de s’ismèngua de su nùmeru de poetas chi ddas pràticant e de su nùmeru de is amantiosos chi ddas ascurtant e/o chi ddas leghent” – aici comenti agataus scritu in s’arregulamentu.

Su cuncursu est partziu in 3 setzionis:

 Setzioni 1 – Arrepentinas e cantzonis a curbas o longas: poesia de meledu, istèrrida a taulinu, in forma iscrita; -

Setzioni 2 – Mutetus e mutus de genias diferentis: poesia de meledu, istèrrida a taulinu, in forma iscrita; -

Setzioni 3 – Arrepentinas, mutetus e mutus de genias diferentis: poesia a cantu de sei, ghetada a bolu; cantzonis a curbas o longas, cantadas, bastit chi siant originalis (pensadas e iscritas de su poeta candidau e mai premiadas in àterus cuncursus).

Po pigai parti a su cuncursu de poesia ddu at tempus finsas a su 15 de su mesi de cabudanni 2025. 

In su giassu istitutzionali de sa Provìntzia de Aristanis https://www.provincia.or.it/it/UfitziuLimbaSarda/novas/nova/Prima-edizione-del-Concorso-di-poesia-Tessende-rimas/   est publicau s’arregulamentu e fait a ndi scarrigai su modellu de partetzipatzioni po pigai parti a su cuncursu

Po totu is àteros informos e crarimentos faghet a telefonare (su martis, su mèrcuris e sa giòbia a mangianu) a is nùmeros 0783/793413 o 334/8408008 o 349/6025986 o a mandai un’e-mail a s’indiritzu limbasarda@provincia.or.it