Dònnia annu, a s’acabbu de su mesi de cabudanni, is lìnguas torrant a “si fait a intendi” in Europa.

In su 2001 su Consillu de Europa, a manus de pari cun sa Commissioni Europea, at istituiu sa ''Dii Europea de is Lìnguas”, cun sa punna de fai a connosci sa variedadi manna de lìnguas in Europa e de promovi su patrimòniu culturali e sa diversidadi linguìstica.

De su 2001, dònnia annu, su 26 de cabudanni si festat de sa Dii Europea de is Lìnguas. Comenti narant is fueddus scioberaus po s’editzioni de ocannu “Is lìnguas aberint is corus e is mentis”.

Sa diversidadi linguìstica e culturali de s'Europa est una richesa manna chi bollit amparada, defensada  e mantesa. Is Ministèrus de s’Istrutzioni, is Istitutus linguìsticus, is organizatzionis culturalis e is scolas bollint fai a cumprendi cantu est de importu a connosci e a imparai is lìnguas e in custa Dii cuncordant fainas meda.

Est custa una dii po arregordai totu is lìnguas de Europa e cussas prus pagu connotas puru, po favoressi sa diversidadi linguìstica e culturali de s'Europa, imparendi lìnguas noas.

A imparai lìnguas noas est a fai nasci ligàminis intra de personas e culturas. Est de agiudu po cumpartziri bideas, po traballai paris e po fai nasci comunidadis fortis e ligadas a pari.

Funt 24 is lìnguas ufitzialis de s’Unioni Europea (Bulgaru, croatu, cecu, danesu, olandesu, inglesu, èstone, finlandesu, frantzesu, tedescu, grecu, ungheresu, irlandesu, italianu, lètone, lituanu, maltesu, polacu, portoghesu, rumenu, slovacu, slovenu, spanniolu, e svedesu)  ma est pretzisu a nai ca is lìnguas chi si chistionant funt prus meda! In totu Europa si fueddant 60 lìnguas regionalis e minoritàrias e sa lìngua sarda est una de custas!

Una richesa manna sa lìngua nosta, làstima manna ca arriscat de si nci sperdi... e po nexi de is sardus e totu!

Duncas po nois sardus custa Dii est un’ocasioni po meledai e circai de cumprendi ita donniunu de nosu aiat a podi fai po amparai, avalorai e difendi sa lìngua sua, sa lìngua nosta. Ca a imparai àteras lìnguas e a connosci sa de su logu nostu puru est sa richesa prus manna.

Totu informus in contu de totu is fainas bellas in programma po s’editzioni de ocannu de sa Dii Europea de is Lìnguas fait a intrai a su giassu https://edl.ecml.at/it

a.f.