Is campaneddas ant torrau a sonai giai de cida passada e po is centu e setanta mila dischentis sardus est cumintzau s’annu scolàsticu nou.

Biddas e tzitadis si torrant a animai, nci funt cussus chi intrant a scola po sa primu borta e cussus chi ant a frecuentai s’ùrtimu annu e totus, mannus e pipieddus, intra novidadis e normalidadi torrant , a bellu a bellu, a sa vida de s’istudianti… cun sa svèllia chi sonat a mangianu chitzo po acudì a pigai su postali e is còmpitus de fai a merii.

Sa Presidenti de sa Regioni puru, Alessandra Todde, in is social cosa sua at bòfiu fai a totus is pipius e is piciocheddus is augùrius prus bellus po custu cumentzu de annu scolàsticu.

“Est cumintzau un annu scolàsticu nou, cun librus, letzionis, atòbius, curiosidadi e crèscida. A bois studiantis, chi seis su presenti e su benidori de sa terra nostra, àuguru de bivi custu mesis cun entusiasmu e fidùcia. Su pentzamentu meu est finsas po chini dònnia dii, in mesu de is bancus o peri is corridojus, s’acumpàngiat in custu caminu: is dirigentis, is insenniantis e totu su personali de scola. Aici comenti apu giai fatu ocannu passau puru, in is mesis imbenientis, apu a dedicai tempus po is atòbius me in is scolas ca a ascurtai sa boxi de bosàterus est sa mellus manera po fraigai paris su benidori”

Bonu printzìpiu de annu scolàsticu a totu is studiantis sardus e bonu traballu a chini totu ddus acumpàngiat dònnia dii in custu bellu biàgiu!

a.f.