S’Unioni de is Comunus Parte Montis, in Gonnostramatza su 18 de martzu, at presentau a is comunidadis localis s’atu agiuntivu de su progetu de svilupu territoriali “C.A.S.A. Parte Montis – Cultura, Artesanau, Stòria, Agroalimentari”, un’àteru passu ainnantìis in su caminu de crèscida e avaloramentu de is resursas localis.

A s’atòbiu at pigau parti su Vice presidenti de sa Regioni e Assessori de sa Programmatzioni e de su Bilànciu Giuseppe Meloni chi at giau uficialmenti s’atu agiuntivu a s’Unioni de is Comunus; fiant presentis is sìndigus e su Presidenti de s’Unioni, Moreno Atzei, is amministradoris e consilleris regionalis de su territòriu e sa Presidenti de s’Anci Daniela Falconi.

S’Unioni de is Comunus Parte Montis at arriciu unu finantziamentu po avalorai e acabbai is progetus territorialis: unus 6,2 millionis de èurus po 14 interventus de fai me in totu is comunus de s’Unioni e a custus s’aciungit una cuota prèmiu po unus 7,7 millionis de èurus in totu.

S’atòbiu est s’acabbu de su camminu de programmatzioni chi at bistu nasci sa strategia de svilupu de su territòriu innui is comunidadis localis funt stètias parti ativa. Su progetu punnat a avalorai is bellesas stòricus, culturalis e ambientalis de su territòriu e a afortiai is servìtzius sotzialis e a sa persona. Is propostas castiant a su benidori cun formas de svilupu sustenìbili e contras a d-ònnia forma de discriminatzioni, sighendi is critèrius de su chi in lìngua inglesa si narat “design for all” est a nai progetus chi potzant andai beni po totus e ndi potzant gosai su nùmeru prus mannu de genti. S’aprovu de is atus agiuntivus est un’oportunidadi po afortigai is prospetivas de crèscida de su territòriu.

 “In su mesi de ladàmini is Unionis de Comunus aiant presentau is propostas issoru e a pustis de cincu mesis seus lòmpius a su territòriu po cumpartziri s’acabbu de is interventus chi faint parti de s’atu agiuntivu – at nau su Vice Presidenti de sa Regioni Giuseppe Meloni- Funt resursas de importu chi reconnoscint su traballu mannu chi at fatu su territòriu ponendi in pei un’istrategia profetosa chi at fatu cresci s’economia e sa sotziedadi de is Comunus de s’Unioni”.

Moreno Atzei, Presidenti de s’Unioni de Parte Montis, at bòfiu sutalineai su valori stratègicu de su progetu e s’importàntzia de su finantziamentu arriciu: “ S’agiornamentu de su progetu est s’arresurtau de unu traballu de scuadra chi at postu paris amministratzionis, impresas e realtadis localis. Custu atu agiuntivu est su finantziamentu prus de importu chi s’Unioni apat mai tentu. Sa punna est cussa de giai ainas cuncretas po arrefortzai s’economia avalorendi is ecellèntzias de su territòriu e fendi nasci oportunidadis noas po chini bivit e traballat in Parte Montis. Oi aus fatu un’àteru passu ainnantis in s’impignu nostu po unu isvilupu chi potzat arrespetai custu territòriu e sighiri in su tempus”.

a.f.